Rev 3 | ASO | STEP | Ne'mine losa Izesu' ti' lo lo-nidine' ve: Saladisi numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo: O'moso'mi sikalahu' sevenisi do mino sonohi' seveni do minuve naza nene ti' lo noluve: Lingine igi mili minaa' nani' monovotine nene mo ningo gele nouve. Ado' lutine nene mo oto minevo' alevo' o neive likevo nemu' guvetine nene nomonine'za lutine nene hele vine' neingumu' likeni' neivo mo ningo gele nouze.

Revelation of John 3

Saladisi Numuno Ebeku' Evenele Mulisemu' Luhuvo Ma Gize-ngedelive Lo Izesu' Zohane'ni Lo-imine' Gamazi

1 Ne'mine losa Izesu' ti' lo lo-nidine' ve: Saladisi numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo:

O'moso'mi sikalahu' sevenisi do mino sonohi' seveni do minuve naza nene ti' lo noluve: Lingine igi mili minaa' nani' monovotine nene mo ningo gele nouve. Ado' lutine nene mo oto minevo' alevo' o neive likevo nemu' guvetine nene nomonine'za lutine nene hele vine' neingumu' likeni' neivo mo ningo gele nouze. 2 Upuho' igi otilo. Lengita monotine linge nene ha neiha mo helelido' o neine' nene hize ele' igi di ngi lilo. Nanitekumu' ve. Lingine igi mili iga' nani' monovotine nene neni' O'moso'ne'mo ningine' nene ei' gele neine' makilo' olihe vo damine' nemu' nene mo ninge nouve. 3 Nemu' nene li-lingimikevo ganakuti' gili dani' monokumu' nene gohi gatine gilisa a'mido' e'meti mini lutine di velepe' izilo. Ido' ne'mine ami upuho' igi ma otamilizani' nene naza guminelo' ve alizani' gamenemu' gilamavo iga' naani' ne'minosa nene alosuve. Lingine nene naza aloni' gamenemu' ma gilami nizavosa nene lengita ogo hetelelesuve. 4 Ne neiha Saladisi numuno ebetingu' nene evene' linge ngomo ma nizani' nene geneganalo' goloduvo elaa' neine' ne'mino oko'nida goloso nite' dizo gi'mizamive ma nizani' ingine nene mo lisihe' i nizani' nenako goloduvosi nomine' mokono' initekovo' ngili minavo nenikisi maka' monelesune. 5 A'mine'mine igi ve ma monoli'mi lovou' Satani ivile' ilizave nene genegana'ine mokonokovo' ngili minikevo minevo' minevo' ngemeni dameni dalizaveti gulive'ine minine' buku neuti' engi' gulive'ine nene gilite hulamolosuve. Asi me'nehi velelokisi ido' angelo'veliti ve'nidokisi nene neni' evene'ne nizave lo engi' gulive'ine nene lo soto' olosuve. 6 Gatine ngolo' live ni ma nene O'moso'mi Sikalahu' ne'mo eze evenele mulise minika' minika' angu' nolo-ngimine' gamazi meve nene gililo.

Hiladelehia Numuno Ebeku' Evenele Mulisemu' Luhuvo Ma Gize-ngedelive Lo Izesu' Zohane'ni Lo-imine' Gamazi

7 Ne'mine losa Izesu' ti' lo lo-nidine' ve: Hiladelehia numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo:

O'moso'mi emeni damenisi mino monovo gihile ne'mi meleho minuve guvelesi ve Davidi' gizebo ine' numuno ebe've'mi avazaha minine' numuno ebeli'mi kii've do minuve ado' akahe si'zekelodo' nene ve malitesi ma gizamilizado' o minuve ado' akahe gizekelodo' nene ve malitesi ma si'zamilizado' o minuve naza nene ti' lo noluve: 8 Lingine igi mili iga' nani' monovotine nene mo ningo gele nouve. Me gililo. Lengi' vilizangumu' akahetine nene mo do godeko lehize-lengede nouve. A'mine akahe nene ve malitesi ngeli mo gizamilisave. Ido' lingine amuzo di nizani' nene ha ngomo neingumu' naza ningo gelo lingine neni' gamazi'ne nene gili diivo' mini neni' gulive'ne di minangumu' ataize mo lamangumukisi nene ningo gele nouve. 9 Ido' gililo. Ve ma ingine Satani'mi mulise'veuti' mini O'moso'mi evenele Zuda ve minilizado' lisihe' i minamaha Zuda ve none laa' ave nene naza lokuvo ingine igi lengi' gizedingu' gubi' izi lingimisa neni' lu'ne lengeme nouvoni' nemu' nene mo ningi gililisave. 10 Neni' gamazi lo-lingiduvoni' nene gili disa mulumo geni ele'vole' igi ha gihi'mi vi minani' nenako nemu' nene me misubou' aleve lutine do ningo misubo mukita lengemengu' soto' o-lengedelesa neine' nene soto' iline' gameneukisi lengi' nene alete molo-lengedo minelesuve. 11 Naza nene mo geto alosuze. Evene' malite menitine nene lengito' medeli dikelizaze. Monotine ma di nizani' nene mo di gili' lisa di minilo. 12 Ve ma ingine monoli'mi lovou' Satani ivile' ilizave nene neni' O'moso'ne'mi kekeize lo neine' numu'veu' nene za langise ne'mine minilizave lo ngele'mize molokuvo a'mingu' mini gohi ma heta limi vamilisave. Ido' vamii nizavo engito' nene neni' O'moso'ne'mi gulivesi gizo ido' a'mine O'moso'ne'mi numuno ebe've ado' Okulumokuti' neni' O'moso'nelati' lemo aline' Zelusalemi gosoho' ne'mi gulivesi nene gizo ido' neni' gulive'ne ado' gulive'ne gosoho' nesi nene engito' gizelesuve. 13 Ido' gatine ngolo' live ni ma nene O'moso'mi Sikalahu' ne'mo eze evenele mulise minika' minika' angu' nolo-ngimine' gamazi meve nene gililo.

Laodikia Numuno Ebeku' Evenele Mulisemu' Luhuvo Ma Gize-ngedelive Lo Izesu' Zohane'ni Lo-imine' Gamazi

14 Ne'mine losa Izesu' ti' lo lo-nidine' ve: Laodikia numuno ebeku' evene'ne mulise'mi angeloli'mo engi' lo-ngemeline' gamazi nene luhuvo ti' lo gizezo:

Gamazi'ne do gihile izaakovo' oga' uve O'moso'mi gamazi hize ele' ogo lo soto' oga' uve gihile nenito' gili medelilizado' o minuve ado' O'moso'mo do soto' ine' initeliti ize'nibo minuve naza nene ti' lo noluve: 15 Lingine igi mili minaa' nani' monovotine nene mo ningo gele nouve. Ado' lingine monokumu' gilikevo mu'musi' oti' amoti' ido' hepe' loti' lamoti' oga' neingumu' nene mo ningo gele nouze. Lingine monokumu' gilavo mu'musi' gehepeve ogavo minilizahe ido' hepe' lize neivo minilizahe ilizani' ne'mo nene mo lamine' o neive lo gele nouve. 16 Lingine monokumu' gilavo mu'musi' oti' amoti' hepe' loti' lamoti' oga' neivo oluso' goto' nizani' nemu' nene mo muso ga'ne dizikenako muso vele hulo-lengedelesuve. 17 Lingine ti' li laa' nave: Laza nene mo heneni vai' do molosa heneni aleve mino inite' matakumu' vise' olonido' minamune. Ne'mine laa' naha lingine neve nene mo mulumotine gelelonido' gehepeve mini monoku' goho' gahali' lili' igi lutine'mi vele like vine' mini okodido' inite' nomivo baka' minaa' naani' ne'mine igi monotine nomine' minaa' naani' nemu' nene ma gilamave. 18 Ne'mine igi nizani' nemu' nene naza gatine do ti' lo ma nolo-lingimuve: Lingine monota heneni ve gihile minilizangisi nenitati' nene oloku' gizi di lamine' ani' ngoli nene meni hizilo. Ido' okode nene baka' soto' o neivo evenelite ningilizani' nene lovozo helalone li okodido' inite' ngili minilizangisi nenitati' genegana mokono' nene meni hizi ngilalo. Ido' lutine'mi vele nene ningelingisi a'mingu' hilalizani' malasini nenitati' meni hizi hilalo. 19 Naza lu'ne ngeme nouvoni' aleve muki' nene ve'ine zopovo si'ze-ngedo ngelemo lihime ngemaa' nouze. Nemu' nene lingine monokumu' nene gilingili igi minisa lutine di velepe' izilo. 20 Gililo. Naza nene lutine'mi gatedo' nene ote mino dizo alosa okoho' okoho' izo nouve. Ido' lengikuti' malite no'ne gili akahe ma si'zi-nidilizani' nene naza nizangu' dizekuvo noso' nite' nenikisi engikisi makato' nalosune. 21 Ve ma ingine monoli'mi lovou' Satani ivile' ilizave nene naza gele ngemekuvo naza Satani ivile' oko me'nehosi maka' mo'mosi'vela eveneto' gizebo o nosine' ne'mino ingine nenikisi maka' mo'mosi'nela eveneto' gizebo ogo minelesune. 22 Gatine ngolo' live ni ma nene O'moso'mi Sikalahu' ne'mo eze evenele mulise minika' minika' angu' nolo-ngimine' gamazi meve nene gililo.